32.
(BIPOLARIDADE)
A última en saír de min que me peche os ollos.

31.
(GO VEGAN, LOVE)
Apostatar do veganismo por mor das bolboretas no estómago.

30.
(DESEXO)
Un dedo teu na miña boca rema por un mar de silencio.

29.
(DEPÓSITO A LONGO PRAZO)
Os segredos mellor gardados teñen pactos coa morte.

28.
(DESEXO II)
Todos os animais que me viven entre as ingoas están agardando unha soa orde para facerse inverno.

27.
(SER HUMANO)
Corpo: a bolsa e a vida.

26.
(MIGRAÑA)
Os dous polos cerebrais tratan de matarse. Unha guerra civil no lugar máis inaccesible do (meu) mundo.

25.
(DESEXO III)
Na túa boca envaíño as miñas armas.

24.
(FESTA DE ANIVERSARIO)
Crepito como un lume moi vello. O meu nome fala do cansa que estou.

23.
(DESEXO IV)
Que a túa e a miña sombra se acheguen ata proxectar un mesmo corpo.

22.
(ESCOLIOSE)
Por dentro estou chea de interrogantes.

21.
(DESEXO V)
Tras das portas do meu armario andas ti devorando o monstro que me devora.

20.
(SOIDADE)
Tendo a pel a secar despois de tela usado toda a noite para arroupar o noso frío.

19.
(FEBRE)
No meu delirio hai sacodidas marítimas. Aboio nunha outra penumbra. Entráchesme polo sangue.

18.
(FILOLOXÍA)
Estudei a morfoloxía do teu territorio. Unha palabra túa bastaría para fanarme.

17.
(RESPONSABILIDADE)
Os nosos fillos teñen o rostro exacto dos nosos medos.

16.
(VOYEUR I)
Quero ver como encaixa o teu dano na miña ferida.

15.
(INFIDELIDADE)
Non son a outra. Son a protagonista do meu hemisferio. Como a Lúa cando é día. Como o sol cando te deitas.

14.
(POEMA)
Todo o que me cae da boca ao chan prende unha planta de veleno. Nada nace.

13.
(TI)
Ti non eras en absoluto ate que te fixen nome, carne e sombra.

12.
(INVERNO)
Na nudez de todas as árbores resprandece a celulite das laranxas.

11.
(FALSO)
Redondeas todos os circunloquios e atravesas as elipses só para que o teu non soe a outra cousa.

10.
(VELENO)
A túa lingua deixou na miña pel un rastro que borrou todos os percorridos do sangue.

9.
(POLITICA LINGüÍSTICA)
Nacín bífida por falarche e lamberte ao mesmo tempo.

8.
(DESEXO VI)
O desexo é esa teima de aprender a mastigar con outras fauces

7.
(NAMORO)
Respiro como se me perseguise un lobo. Déitome disposta a deixar para a túa boca todo o cárnico que leve posto.

6.
(POESÍA ERÓTICA)
Os haikus escríbochos coa lingua. Tres versos riscados no embigo, no veludo das coxas, no lugar da túa tinta nuclear.

5.
(PERCORRIDO)

Entre a túa lingua e a miña os nosos corpos, incomunicados.

4.
(VIAXE DE IDA E VOLTA)
Entras en min e eu saio a través do meu berro, que ecoa na túa boca.

3.
(PINTAR)
Descubro por riba dos lenzos brancos todas as cores que apousamos. Igual ao pintar que ao facer a cama.

2.
(CINISMO)
Non queres que o meu corpo (se) (che) resista.

1.
(CO(g)ITO, ERGO SUM)
Como raíña devórote como alfil ou
derrotarasme.